Katrín Halldórsdóttir

Við lok námskeiðs

2003-11-30T22:30:00.000Z

Þá er þessari önn lokið, ótrúlegt en satt, og bara prófin framundan. Ég á reyndar eftir að skrifa eina ritgerð í tengslum við stærðfræðikjörsviðið mitt en ég kippi því í liðinn. Þetta er búið að vera froðlegt og skemmtilegt námskeið óg ég hef ýmislegt nytsamlegt og kynnst mörgu. Ég er þó enn að venjast þessu með að blogga reglulega en ég held að þörf og tímarammi hvers og eins sé mismikill og því verður bloggið mismikið. Ég einhvern veginn hef ekki þessa þörf fyrir að tjá mig á netinu en það hefur verið gott að kynnast þessu og nú veitég allt um blogg því ég hafði ekki heyrt um þetta fyrst hér í haust. Ég hef lokið við skilasíðu mína og er nokkuð sátt, ég á nú eflaust eftir að fikta í henni af og til og bæta inn á hana og þá sérstaklega myndum. Ef þið viljið skoða skilasíðuna mína þá er slóðin þessi http://nemendur.khi.is/katrhall/skolastarf. Ég vil því þakka fyrir veturinn og bíð spennt eftir næsta námskeiði í upplýsingatækni eftir jól. Bless í bili, því hver veit nema ég taki upp á því að blogga við tækifæri.

Skoðun á verkefni

2003-11-26T13:34:00.000Z

Ég fór inn á siðu hjá Eyrúnu Helgu Þorleifsdóttursem er í þessu námskeiði í fjarnámi. Hún er með mjög skemmtileg vefrallý um sólkerfið. Þetta er mjög fróðlegt verkefni sem börn hafa örugglega mjög gaman og gott af að skoða. Börn hafa alltaf jafn gaman af því að spá í himingeiminn og allt sem í honum er. Mæli því með þessu verkefni og hvet alla sem hafa áhuga á þessum málum að skoða þetta verkefni því þar er bent á margar skemmtilegar slóðir á íslensku um sólkerfið og annað í himingeimnum.

Nokkrar línur

2003-11-25T23:59:00.000Z

Á morgun er síðasti tíminn í Upplýsingatækninnin ´hjá okkur. Við erum búin að kynnast hinu og þessu og það er alltaf gaman að læra eitthvað sniðugt sem ný tækni hefur upp á að bjóða. Morgundagurinn fer sjálfsagt í fínpússningu á hinum ýmsu verkum og svo eigum við að skoða eitthvað sem Salvör ætlar að kynna fyrir okkur. Ég hef bætt nokkrum myndum við síðuna mína undir myndaalbúm og á ensku síðuna mína. Á hinsvegar eftir að klára skilasíðuna mína og laga aðeins til hér og þar. Annars rakst ég á ofsalega skemmtilegt blogg semég hvet ykkur að lesa og er skrifað af bekkjarfélaga mínum og er um uppáhaldsmat hans. Björgvin bloggari.Kveðjur í bili.

Vika eftir

2003-11-23T12:14:00.000Z

Þá er komið að því aðeins vika eftir af skólanum sem þýðir að stutt er í prófin. Á miðvikudaginn í tímanum hjá okkur þá tókst okkur að klára síðuna um skólaheimsóknina í Árbæjarskóla, slóðin er http://nemendur.khi.is/marieids/skolastarf/skolaheimsokn.htm. Ég held að við séum þokkalega sátt með afraksturinn en við eigum sjálfsagt eitthvað eftir að laga hana til í vikunni. Ég er núna að vinna í því að snyrta til heimasíðuna mína á þessu námskeið og fullgera skilasíðuna þannig að þetta er nú allt að koma. Svo á ég eftir að skrifa tvær ritgerðir í tveimur stærðfræðiáföngum sem ég er í og stefni að því að klára þær í vikunni. Nenni nefninlega ekki hafa þær hangandi yfir mér í prófunum.

Jæja jæja

2003-11-18T21:37:00.000Z

Hvað er nú þetta eiginlega, ef bloggið gleymist bendir það til þess að nóg hafi verið að gera hjá mér. Annars er lítið að gerast í upplýsingatækninni eins og er. Við erum að vinna í því að setja saman vef um sólaheimsóknina okkar og ættum við að ná að klára hana nánast á morgun ef allt gengur eftir áætlun. Annars skilst mér að við fáum einhver ný verkefni á morgun þar sem við eigum að skoða eitthvað og gefa comment á það. En það kemur nú allt í ljós. Svo er það skilasíðan, ég veit ekki alveg hvort það er einhver önnur síða en sú sem ég er með á forsíðunni hjá mér núna. En það á sjálfsagt líka eftir að koma í ljós. Annars er alveg ótrúlegt hvað þessi önn hefur verið fljót að líða. Mér finnst ég bara vera nýmætt eftir sumarfrí og það eru alveg að koma jólapróf, alveg ótrúlegt. Við getum þó ekki kvartað um að hafa ekkert að gera og nóg er af verkefnum fram að prófum. En miðað við hvað tímanum líður þá verð ég sjálfsagt sest við jólasteikina áður en ég veit af.

Eftir helgina

2003-11-10T18:32:00.000Z

Þá er þessi helgi búin, var bara svolítið kvefuð og sleppti meira að segja bekkjarpartýi sem var á förstudagskvöldið. Annars frétti ég nú að þetta partý hafi verið ansi skrautlegt og það hefði verið gaman að sjá ásigkomulagið á fólkinu, en það bíður betri tíma. Ég var áðan að skrifa upp allt sem fyrir augu mín bar í heimsóknina við Árbæjarskóla og allar þær upplýsingar sem við fengum hjá Birni Jónassyni. Við ætlum hvert og eitt okkar að vera búin að undirbúa aðeins til að auðvelda okkur vinnuna í tímanum á miðvikudaginn því gott væri ef hægt væri að nýta þann tíma mjög vel og komast vel áfram með vefsíðuna sem við eigum að setja saman. Að öðru leyti hefur svosem verið nóg að gera undanfarið og ekki er það minna framundan. Skiluðum stórri ritgerð á föstudaginn og öðru verkefni í morgun þannig að það er frá og þá getur maður snúið sér að því næsta.

5. nóvember

2003-11-05T22:40:00.000Z

Í dag fórum við fimm nemendur, ég, María Helen, Björgvin, Kim og Kolbrún, úr námskeiðinu í heimsókn í Árbæjarskóla að skoða aðstæður og kennsluhætti í upplýsingatækni. Í Árbæjarskóla var mjög vel tekið á móti okkur af Birni Jónassyni. Hann sagði okkur allt frá öllu, gaf okkur kennsluáætlun í þessu fagi og svaraði öllum okkar fyrirspurnum. Síðan fór hann með okkur um skólann og sýndi okkur þá tölvuaðstöðu sem þau hafa og hvernig að öllu því tengdu er staðið í skólanum. Við tókum líka fullt af myndum, tókum viðtölin upp á segulband og punktuðum allt niður sem fyrir augu okkar bar. Semsagt mjög skemmtileg heimsókn í alla staði og virkilega góðar móttökur hjá öllum. Þá er það verkefni næstu viku að setja saman um þessa heimsókn vef þar sem allt kemur fram sem við urðum vísari.

Blogg

2003-11-04T18:59:00.000Z

Þetta er nú meira ástandið maður hefur ekki bloggað í heila viku. Dagskráin síðustu vikuna hefur verið svo þétt setin að maður hefur ekki haft svigrúm til að gera neitt annað. Maður þarf nú víst að sinna börnum og búi líka því ekki fer það í burtu þó að maður sé að drukkna í verkefnum. Á morgun förum við fimm saman að heimsækja Árbæjarskóla og eigum að kanna aðstæður við upplýsingatækni þar og tæknibúnað, tala við kennara og annað þvíumlíkt. Um þetta eigum við síðan að gera eitt stykki vefsíðu sem tengd verður síðan inn á okkur öll. Það verður gaman að breyta um umhverfi og skoða aðstæður í skólum. Jæja læt ef til vill heyra í mér á morgun með hvernig heimsóknin fór.

Þriðjudagskvöld

2003-10-28T23:41:00.000Z

Nú sit ég hér með hárið út um allt, úfið eins og á brjáluðum prófessor og er búin að kreista og snúa upp á allar stærðfræðilega sinnaðar gráar heilasellur sem í höfði mínu eru. Ég er semsagt að lesa fyrir próf í rúmfræði og get orðið svolítið frústreruð ef ég finn ekki lausn á einhverju dæmi. Ég er að sjálfsögðu ekki búin að hafa neinn tíma til að finna til myndir á enska vefinn eins og ég ætlaði mér, kannski ég reddi því í fyrramálið. Excel verkefnin mín eru komin vel á veg og er fegin að hafa notað soldið helgina í þau. Jæja þá er best að ég fari að tékka á koddanum mínum svo að þessar gráu virki eitthvað í fyrramálið því ekki veitir af.

Helgin

2003-10-27T21:27:00.000Z

Helgin hjá mér er aðallega búin að fara í að leysa excel verkefni fyrir eitt stærðfræðifagið sem ég er í. Þetta eru ansi mörg verkefni en mis viðamikil. Við eigum að skila slatta af svona verkefnum á föstudaginn næsta og ég ákvað að hafa góðan tíma fyrir þetta. Annars í tengslum við upplýsingatæknina þá ætlaði ég að muna eftir að skanna inn nokkrar myndir til að hafa á ensku síðunni minni. Það er svo spurning hvort ég muni eftir að finna þær til. Núna þessa stundina er ég að læra fyrir próf í rúmfræði sem verður á miðvikudagsmorguninn. Það gengur nú bara ágætlega og ég ætla að snúa mér aftur að því núna.

21. október

2003-10-22T14:40:00.000Z

Í tímanum í dag var Torfi með kynningu á verkefni sem við eigum að fara að taka okkur fyrir hendur. Okkur er skipt upp í fimm manna hópa og við eigum að fara að heimsækja Árbæjarskóla. Þar eigum við að kanna aðstæður í tengslum við upplýsingatækni, hvernig staðið er að málum, tækjabúnaður, aðstæður, taka viðtöl við kennara og nemendur og fleira. Um þetta allt saman eigum við svo að setja saman vef sem verður svo tengdur okkur öllum fimm. Annars er verið að taka fólk upp á vídeó í dag til að nota í verkefnið okkar í microsoft producer. Við vorum hinsvegar svo séð að við tókum okkar upp í gær, voða gaman, og náðum bara að klára að setja þetta saman á augabragði. Núna erum við semsagt að bíða eftir leiðbeiningum um hvernig setja eigi þetta allt saman inn á vefinn. Microsoft producer er alveg brilliant forrit og virkilega einfalt í notkun.

Eftir helgina

2003-10-20T16:58:00.000Z

Jæja þá er enn ein helgin búin. Á föstudagskvöldið var haldið fyrsta partýið á stærðfræðikjörsviðinu sem var mjög skemmtilegt. Maður náði þó að læra nokkur ný nöfn og svona því við erum ansi gjörn á að halda í bekkjarfélagana frá því í fyrra. Helgin var svo ósköp venjuleg, lærdómur, heimsóknir og fótboltaæfingar hjá börnunum. En nú er kominn mánudagur enn eina ferðina. Við þurftum að lesa upp úr skáldsögu í íslensku fyrir framan bekkinn og gekk það bara framar vonum þrátt fyrir stress. Nú er ég búin að vera að vinna svolítið í persónulegri síðu á ensku og er hún bara langt komin. Ég á eflaust eftir að bæta aðeins við textann og svo einhverjum myndum. Semsagt þetta gengur allt saman og á morgun ætlum við að prófa okkur áfram í vídeó upptöku og klippingu. En núna þarf ég eiginlega að fara að læra fyrir stærðfræðipróf á morgun.

Miðvikudagurinn 15. okt og fleira

2003-10-18T19:34:00.000Z

Í miðvikudagstímanum fórum við betur yfir spjallkerfið og skoðuðum innlagnir og fleira. Það voru rosalega margir búnir að tjá sig þar og gaman að sjá hvað allir eru virkir í að tjá sínar skoðanir. Eftir þetta fengum við að kynnast microsoft producer kerfinu sem hægt er að downloada frá www.microsoft.com frítt. Þetta kerfi er mjög einfalt í notkun og í því er hægt að splæsa saman glærum, hljóði og mynböndum og mynda þannig heildar margmiðlunarpakka. Við fengum kennslu á forritið og fengum að prófa og þetta er mjög snögglært. Við ætlum að vera þrjú saman að sjóða saman verkefni í þessu forriti og erum byrjuð að undirbúa það. Mér líst hinsvegar ekkert á að vera á einhverri videóupptöku en maður kemst víst ekki hjá því þennan veturinn því það á líka að taka okkur upp á vídeó í íslenskunni.

Nóg að gera

2003-10-14T20:39:00.000Z

Það er nú nóg af verkefnum framundan. Verkefni eða próf í nánast öllum námsgreinum. En það er alltaf við því að búast þegar önnin er svo að segja hálfnuð. Stundum virðist þetta óyfirstíganlegt en þetta reddast alltaf samt einhvernveginn. Áður en maður veit af verður maður mættur í jólaprófin. Jæja mér tókst að finna útúr þessu með síðun sem ég var að reyna að búa til. Fann einhverjar leiðbeiningar um vefsíðugerð með Frontpage á netinu og það reddaði mér. Á morgun er svo foreldraviðtalsdagur í skólanum hjá krökkunum, þarf því að redda pössun og gæti veriðáð ég verði aðeins sein í Upplýsingatæknina en ekki meira en svona 10 mín. Vonandi missi ég ekki af neinu spennandi í innlegginu.

Monday monday

2003-10-13T17:26:00.000Z

Enn og aftur kominn mánudagur, rosalega er tíminnn fljótur að líða . Ég er núna búin að tékka á spjallrásinni og gaman að sjá hvað margir eru búnir að tjá sig um málefni stráka í skólakerfinu og um stærðfræðikennslu. Ég lét að sjálfsögðu ekki mitt eftir liggja og hef bætt innleggi mínu í hópinn. Er enn að hugsa um síðuna mína sem á að vera á ensku, verð að ná að setja inn theme á síðuna, það er ekki alveg að virka og skil ekki af hverju. Jæja nóg í bili.

Miðvikudagstíminn og fleira

2003-10-11T12:28:00.000Z

Síðasta miðvikudag vorum við að skoða spjallsíður eða síður þar sem fólk getur sett fram skoðanir sínar á hinum ýmsu málefnum. Við æfðum okkur í að setja inn svör og umfjallanir. Merktum okkur með lítilli lógó mynd. Ég er núna búin að setja inn síðu með ferilskránni minni en er að vinna að ensku síðunni minni. Er hins vegar að lenda í vandræðum með að ég bjó til nýja síðu en hún kemur ekki með sama útlit og allar hinar, þarf að finna út úr því einhvern veginn.

Þriðjudagspælingar

2003-10-07T19:34:00.000Z

Þá er komið að því að ég setjist niður og gefi mér smá tíma í smá blogg. Það er sko búið að vera nóg að gera undanfarið og nú erum við á kafi í íslenskuverkefni sem á að skila á föstudaginn. Annars fór ég nú og nældi mér í smákvefpest og ómögulegheit og hefur það að sjálfsögðu tafið allt vinnuferli hjá manni. En það gengur nú víst ekki að vera eitthvað lasinn þegar maður er í svona námi þannig að á morgun verð ég örugglega orðin góð. Ég fann í gömlu word skjali gamla atvinnuumsókn sem ég hafði einhvern tíma sett upp og er að hugsa um að hafa hana til hliðsjónar þegar ég geri ferilskrána mín þar sem þar kemur meira og minna allt fram sem þarf að vera þar. Það þarf bara aðeins að laga það til. Ég þarf bara að fá á hreint hvar sú síða á að koma nákvæmlega og þá get ég gengið frá þessu öllu saman. En ég kemst nú væntanlega að því öllu saman á morgun.

Persónulegur vefur

2003-10-02T22:15:00.000Z

Ég er búin að skoða efnið um persónulega vefinn sem við eigum að útfæra og ég er að hugsa um að útbúa svona ferilskrá eða CV um mig því það er aldrei að vita hvort það komi ekki einhvern tíma til góða. Svo líst mér best á að gera smá yfirlit og umfjöllun um mig og mína á ensku. Tæknisagan mín og vefleiðangurinn er held ég bara orðin nokkuð búin nema mér detti einhverjar breytingar í hug seinna meir. Þetta ætla ég að láta duga í bili og fara að vinna að þessum persónulega vef.

Miðvikudagstíminn 1.okt.

2003-10-02T13:28:00.000Z

Jæja þetta er nú ekki hægt, maður gleymir alveg að blogga það er búið að vera svo mikið að gera. Í tímanum í gær þá fengum við að vinna að okkar verkefnum sem við eigum að skila á morgun á vefsíðu. Það var ágætt að fá að vinna þetta svolítið í skólanum og hafa hjálpina innan handar. Þetta er svo tímafrek vinna að þá spara ég mér það þessa vikuna að vera að stússast í þessu og mikið heima. Hinsvegar eigum við að fara að hugsa um efni á persónulega síðu okkar. Tæknisagan mín og vefleiðangurinn er að mestu lokið, aðeins eftir að fínpússa. Sagan er kannski of löng en maður bara gleymdi sér í upprifjuninni. En núna ætla ég að lesa leiðbeiningarnar um persónulega vefinn og fara að hugsa hvað ég get tekið saman fyrir hann.

Drög að tæknisögu

2003-09-26T18:47:00.000Z

Fyrsta minning mín um eitthvað tölvutengt var tölvuleikur sem leikinn var á einhvers konar leikjatölvu sem tengd var í svart-hvítt sjónvarp. Hann gekk út á það að passa að kúla færi ekki út af skjánum og á tveimur hliðum skjásins voru stikur sem hægt var að hreyfa upp og niður til að hindra það. Þetta þótti mér og bróður mínum stórmerkilegt fyrirbæri. Ekkert gerðist svo í tölvumálum fyrr en að ca . árið 1982 eignaðist fjölskyldan heimilstölvu sem hét Vic-20. Þetta var stórmerkileg græja. Hún var tengd við sjónvarpið og var í lit. Eins og nafnið gefur til kynna var hún heil 20k. Og þegar maður hugsar til baka finnst manni ótrúlegt að hún skuli yfir höfuð hafa getað gert nokkuð. En það var nú samt hægt að spila marga leiki í henni. Leikirnir voru á kassettum sem voru spilaðar af sérstöku tæki sem tengt var við Vic-inn. Ca. tveimur árum seinna varð nú aldeilis bylting á heimilinu þegar fjárfest var í Commodore-64. Hún var 64k og voru leikirnir miklu flottari og æðisleg grafík (miðað við Vic-inn). Ég man sérstaklega eftir því þegar við systkinin sátum sveitt yfir einhverjum tölvublöðum sem voru með forritum í , annað okkar las upphátt meðan hitt pikkaði inn hinar ýmsu skipanir. Oftar en ekki virkaði ekki neitt og á skjáinn kom "syntax error". Það þurfti nefninlega ekki nema eina smá prentvillu í blaðinu og þá var allt ónýtt.
Af kennslu á tölvur man ég fyrst eftir einhvers konar forritunar kennslu á eldgamlar IBM-tölvur í MR á árunum 1985-1987. Það þótti manni nú frekar leiðinlegt, svartur skjár og grænir stafir, enda hefur sá lærdómur aldrei nýst manni síðan.
Árið 1987 hóf ég svo störf í Landsbankanum. Þar voru fínar tölvur sem þóttu mjög háþróaðar fyrir þann tíma en samt með þetta týpíska útlit, svartur skjár með grænum stöfum, en þó flott og þægilegt vinnuumhverfi. Árið 1990 fór ég yfir til Íslandsbanka. Fyrst þegar ég byrjaði þar voru gamlar tölvur úr Iðnaðarbankanum, pínulítið og skrítið lyklaborð með alls konar táknum. Þetta var mikil afturför í tækni miðað við LÍ. Tölvubúnaður bankans var þó fljótlega uppfærður og komu þá tölvur með litaskjá og mjög svo notendavænu umhverfi.
Á þessum árum mínum hjá Íslandsbanka, 1990 - 2001, urðu miklar tæknibreytingar og sjálfsagt hef ég upplifað það tímabil sem tæknibreytingarnar hafa verið sem mestar. Fyrstu kynni mín af Internetinu og tölvupósti voru líka þar. Þegar maður heyrði af þessu fyrst fannst manni þetta ótrúlegt, að það væri hægt að skrifa skilaboð eða bréf á skjáinn og svo væri einhver út í heimi sem gat lesið það næstum samstundis.
Ég ætla að láta þetta duga í bili og setja restina á síðuna mína.

Vefleiðangur og tæknisaga

2003-09-25T13:04:00.000Z

Í tímanum í gær fórum við að skoða og undirbúa okkar næsta verkefni og er það vefleiðangur. Við gerðum prufu leiðangur um morðið á Önnu Lindh til að fá smá tilfinningu fyrir því sem við eigum í vændum. Ég er strax komin með einhverja hugmynd um hvað ég get hugsanlega nýtt mér í þessu verkefni en ætla ekki að ljóstra upp neinu strax. Ekki fyrr en ég hef skoðað síður sem geta nýst í verkefnið og útfært þetta betur í huganum. En skrifa um það á næstu dögum enda held ég að þaðéigi að skila þessu á vef núna í byrjun október. Einnig eigum við að skrifa svokallaða tæknisögu, þ.e. reynslu okkar af tölvum og annari slíkri tækni. Okkar fyrsta reynsla, hvernig við nýtum hana og hvernig við sjáum þetta fyrir okkur í náinni framtíð. Það verður spennandi að rifja þetta upp og ég stefni að því að skrá drög að henni hér á blogginu í kvöld eða á morgun. svo verður hún nánar útfærð og sett á vefinn eins og allt hitt.

Fikt í FrontPage

2003-09-22T21:07:00.000Z

Þegar ég var að voinna að Vefrallýinu mínu var ég svo ósátt við bakgrunninn á heimasíðunni þannig að það bauð nú upp á það að ég færi aðeins að fikta. En ég hef nú einmitt svolítið gaman af því. Ég skoðaði öll themein sem forritið býður upp á og var ekkert spennt fyrir þeim. Þá datt mér í hug að búa til bakgrunn í Photoshop, bara ljósan lit með einhverjum effect. Ég prófaði mig áfram þar til að ég var nokkuð sátt. Svo var það nú höfuðverkurinn að koma þessu inn á heimasíðuna. En með smá fikti og spekúlasjónum þá tókst þetta nú allt saman og afraksturinn má sjá á síðunni og dæmi nú hver fyrir sig!!

PowerPoint glærukynning

2003-09-19T15:52:00.000Z

Við erum þrjú , ég, María Helen og Björgvin, sem höfum ákveðið að vinna saman að þessu verkefni og verður það þá því lengra sem því nemur. Við höfum hugsað okkur að taka fyrir kynningu á nýja stærðfræði námsefninu Geisla. Kynningin á að höfða til foreldra barna í 5.bekk. Þar á að koma fram almenn kynning á þessu námsefni, markmiðum þess, nýrri nálgun á stærðfræðilegu efni og útskýringar á nýjum táknmyndum sem eru í bókunum. Þetta viðfangsefni ætti að nýtast okkur vel þar sem við erum öll á stærðfræðikjörsviði.

Miðvikudagstíminn

2003-09-18T17:29:00.000Z

Við fórum strax að vinna með FrontPage og ég náði að skrá niður punkta um hvað og hvernig ætti að gera þetta og hitt. Einnig var okkur bent á góðar leiðbeiningasíður hvað varðar vefsíðugerð í FrontPage. Ég var mjög ánægð með það. Þetta gekk semsagt allt saman mjög vel og ég mundi nú bara ótrúlega margt síðan í fyrra. Vefrallýið er semsagt komið á vefinn en ég á eftir að laga það aðeins til og snyrta. Ég dunda mér við það um helgina. Slóðin á vefrallýið og síðuna tengda þessu námskeiði er http://nemendur.khi.is/katrhall/skolastarf. Ég ætla svo líka að æfa mig í að útbúa borða til að setja á vefrallýið í Photoshop, það á svo eftir að koma í ljós hvernig það gengur.

Hugleiðingar

2003-09-16T18:09:00.000Z

Á morgun á ég svo væntanlega að vinna meira með Vefrallýið í tíma hjá Salvöru. Það á víst að setja þetta upp á vefsíðu unna í FronPage. Það verður gaman að rifja upp hvernig maður setur saman heimasíðu því að þó að ég hafi gert eina slíka í fyrra þá er ég ekki með neina punkta eða neitt lesefni um heimasíðugerðina. Í þetta skiptið skal ég nú passa vel upp á það að nótera allt hjá mér. Því það þarf ekki annað en að gleyma einhverju einu atriði og þá fer allt í klessu og það er nú ekki nógu gott. Það verður því spennandi að vita og sjá hvernig við eigum að vinna út úr þessu Vefrallýi.

Vefrallý

2003-09-14T20:13:00.001Z

Jæja, þá koma hér spurningar sem tengjast vefrallýinu. Svörin við þeim er að finna á síðu Blóðbankans. 1. Hvar er Blóðbankinn staðsettur? 2. Hvaða ár var hann stofnaður? 3. Hvert er meginviðfangsefni Blóðbankans? 4. Hvað þarf maður að vera gamall til að gefa blóð? 5. Hvað eru blóðgjafar margir á Íslandi? 6. Hvað er Blóðgjafafélag Íslands? 7. Hvað gefur hver blóðgjafi mikið blóð? 8. Hvað þarf Blóðbankinn margar einingar af blóði á ári? 9. Hvað eru það margar blóðgjafir á dag? 10. Hverjir eru blóðflokkarnir? 11. Hver er samsetning blóðs? 12. Hvert er aðalhlutverk rauðra blóðkorna? 13. Ef mamman er í A blóðflokki en pabbinn í B, hvaða blóðflokki gæti barnið þeirra verið í? 14. Í hvaða þrjá þætti er blóðinu skipt í að lokinni blóðgjöf? 15. Hvað kostar ein eining af síuðum blóðflögum?

2003-09-14T20:13:00.000Z

Hugmyndir tengdar vefrallýinu

2003-09-14T17:23:00.000Z

Jæja nú er komið að því að setja saman nokkrar spurningar fyrir vefrallýið og kafa ofan þann vef sem ég hef valið mér. Verkefnið mitt á kannski við á miðstigi grunnskólans, geri mér kannski ekki alveg grein fyrir því í hvaða bekk en ætti að þykja áhugavert. Rallýið á að eiga sér stað á síðu Blóðbankans. Þetta er síða sem nemendur grunnskólanna fara mjög ólíklega inn á en er svo mjög áhugaverð þegar hún er skoðuð og býður upp á krakkahorn með upplýsingum og fleira efni sem höfðar til barna.

Hugmynd að vefrallý

2003-09-10T15:23:00.000Z

Fyrst þegar talað var um að við ættum að búa til vefrallý datt mér í hug að nota tækifærið og nýta mér það í náminu. Ég er á stærðfræðiskor og við eigum að kenna á yngri barna sviði eftir áramót. Það er hinsvegar sama og ekkert efni til á vefnum um stærðfræði fyrir þennan aldurshóp á íslensku. Þá varð ég að hugsa upp á nýtt. Mér datt í hug að fara inn á vef Námsgagnastofnunar því að ég vissi að þar væru margar krækjur á hinu ýmsu fróðlega vefi. Ég hafði rétt fyrir mér og úr nógu er að moða. Ætla aða skoða þetta betur í rólegheitunum heima hjá mér en er komin með nokkrar góðar hugmyndir. Gæti hugsað mér að nota vef Blóðbankans eða Sorpu. Ég ætla að leggja höfuðið í bleyti og læt vita um leið og ég finn upp á einhverju sniðugu.

Leikjavefir á netinu

2003-09-10T13:55:00.000Z

Við höfum einnig skoðað leikjasíður á netinu og er til ógrynni af þeim. Á síðu námskeiðsins er hægt að finna linka á margar þessara síða. Þar eru margir smáleikir, púsluspil, þrautir o.fl. Annars er uppáhaldsnetleikurinn minn Mahjong sem finna má á msn.com eða á leikur1.is, mæli eindregið með honum. Það sem er verst við hann er að maður verður alveg fastur við tölvuna.

Tími tvö

2003-09-10T13:43:00.000Z

Í dag erum við meðal annars búin að skoða nokkrar samskiptasíður, sumar opnar og aðrar þurfa skráningu. Þetta eru síður þar sem ýmist er fjallað um einhver málefni eins og malefnin.com. Svo var vinavefur sem er alþjóðlegur og þú þarft að fá boð frá öðrum vini til að komast inn á, friendster.com.

Fyrsta vikan búin

2003-09-10T00:03:00.000Z

Jæja þá er fyrsta vikan liðin og ég er búin að fara í tíma í öllum mínum námsgreinum. Líst bara ágætlega á þetta allt saman, ég ætti alla vega ekki að deyja úr leiðindum í vetur. Ég bíð svo líka spennt eftir að fá að takast á við verkefni þessa námskeiðs, þá sérstaklega að læra betur á Front page. Maður gerði svo sem sína heimasíðu í fyrra en hefur ekkert í höndunum ef maður ætlar að ráðast í nýja. Það verður því ágætt að rifja upp og punkta hjá sér ferlið við þetta allta saman. Svo er bara að muna að blogga reglulega. Jæja nú held ég að það sé kominn háttatími hjá mér, góða nótt.

Kötu kynning

2003-09-03T14:50:00.000Z

Hæ Katrín Halldórsdóttir heiti ég en er alltaf kölluð Kata. Ég er á öðru ári í Kennaraháskólanum og er á stærðfræði kjörsviði!! Ég er 36 ára og er gift þriggja barna móðir og bý í Garðabænum. Ég er núna að byrja á námskeiði sem heitir Upplýsingatækni og skólastarf og þar eigum við að tengjast þessari ágætu blogg síðu og halda nokkurs konar dagbók fyrir okkur þar. Mér líst bara ágætlega á þetta en þarf sjálfsagt að venjast því að skrifa hugsanir mínar niður og framvindu mína í lífinu og skólanum. Ætli það endi ekki með því að maður verður háður þessu fyrir rest.

2003-09-03T14:36:00.000Z

Hæ og hó þetta er fyrsta prufa mín á bloggin hér í Kennó!!!